امریکايي چارواکو هڅې پیل کړې دي څو پر مخکیني ولسمشر ډونالډټرمپ د مرګوني برید سبب روښانه کړي.
اوسمهال چارواکو یو ۲۰ کلن ځوان توماس ماتیو کروکس په پنسلوانیا ایالت کې د انتخاباتي کمپاین په غونډه کې پر ټرمپ د برید عامل بللی دی.
کروکس د امنیتي کسانو په ډزو ووژل شو او د یو بل ګډونوال هم د ډزو پر مهال وژل شوی او دوه نور نندارچیان سخت ټپیان دي.
ټرمپ وروسته وویل چې دی په غوږ لګېدلی دی.
له برید وروسته امنیتي کسان د مخکینی ولسمشر پر شاوخوا راټول شول او د پېښې له ځایه یې وایست.
ډونالډ ټرمپ له پېښې وروسته پر خپل ایکس پاڼه ولیکل، دا د منلو وړ خبره نه ده چې په امریکا کې دا ډول پېښې کېږي.
ولسمشر بایډن، امریکايي سیاستوالو او د نړۍ د ګڼو هېوادونو مشرانو پر ټرمپ برید غندلی دی.