د ترکیې ولسمشر رجب طیب اردوغان ویلي، تر هغو چې په غزه کې جګړه روانه وي، د ناټو له پوځي متحدانو او اسراییل سره به د راروانو همکاریو طرحه تصویب نه کړي.
اردوغان په واشنګټن کې د ناټو تر سرمشریزې وروسته پرون جمعه پر خپله ایکسپاڼه لیکلي، تر هغو چې د فلسطینیانو په قلمروونو کې پایداره سوله ټینګه نه شي، دا ډول همکاري به ونه مني.
ترکیه له ۱۹۵۲م کال راهیسې د شمالي اتلانتیک د پوځي تړون یا ناټو غړی هېواد دی، اسراییل یې غړیتوب نه لري، خو بیا هم د ناټو د شریک په توګه همکاري کوي.
وخت ناوخت د اسراییل سرتېري هم د ناتو په پوځي تمریناتو کې دخیل وي.
له کله چې په تېره اکټوبر میاشت کې په غزه کې جګړه پیل شوې، د اسراییل او ترکیې ترمنځ اړیکې خورا ترینګلې شوې دي.