د افغانستان له سېلاب ځپلو سره د ترکیې د بشري مرستو یو کاروان پرون چهارشنبې هرات ته ورسېد.
په دې مرستو کې، چې د ریلګاډي په وسیله افغانستان ته استول شوې وې، ۶۲۰ ټنه خوراکي مواد، اوړه، خیمې، کمپلې، صابون او نور اړتیا وړ شیان شامل دي.
تر دې مخکې ترکیې د هرات ولایت زلزله ځپلو ته بشري مرستې استولې وې.
وروستیو سیلونو په افغانستان کې سلګونه کسان مړه او ژوبل کړل، سلګونه کورونه یې ویجاړ او زرګونه هکتاره کرنیزه مځکه یې تخریب کړه.