په چک جمهوریت کې د یوه مسافر وړونکي او یوه بار وړونکي رېلګاډي د ټکر له کبله څلور کسان مړه شوي او ۲۳ نور ټپیان شوي دي.
د اسوشېټېډ پرېس خبري اژانس د راپور له مخې دغه پېښه بېګا ناوخته په پاردوبیسه ښار کې چې له پلازمېنې پراګ سره دوه سوه کیلو متره واټن لري، رامنځته شوې ده.
اژانس د چارواکو په حواله وایي، مسافر وړونکی رېلګاډی له چک څخه سلواکیا ته روان و او شاوخوا درې سوه مسافر په کې سپاره وو.
د چک د کورنیو چارو وزیر ویت راکوشان ویلي، د پېښې ټپیان روغتون ته لېږدول شوي او په وینا یې وضعیت یې د ډاډ وړ دی.
د پېښې لامل تراوسه روښانه نه دی او په دې اړه پلټنې پیل شوي دي.