باختر خبري آژانس چې طالبان یې اداره کوي د افغانستان لپاره د ملګرو ملتونو د ځانګړې استازې روزا اوتونیایووا له قوله خبر ورکوي چې نوموړې وايي، د دوحې په درېیمه غونډه کې به په افغانستان کې د خصوصي سکتور، بانکدارۍ او د مخدرو موادو پرضد د مبارزې پر مسایلو خبرې وشي.
په خبر کې راغلي دي چې مېرمن اوتونبایووا دا څرګندونې د طالبانو د حکومت د کرنې له سرپرست وزیر مولوي عطاالله عمري سره په کتنه کې کړې دي.
د باختر خبر زیاتوي چې ښاغلی عمري به په دوحه کې افغان بزګرانو ته د بدیل معیشت د برابرولو په چاره کې د نړیوالو موسسو د همکارۍ غوښتنه وکړي.
د افغانستان په اړه په دوحه کې راروانه غونډه په نژدې یوه میاشت کې جوړېږي.