په بدخشان کې د طالبانو امنیه قومانداني وایي، ننتۍ چاودنې د فیضاباد په ښار کې د دوی درې پولیس وژلي او پنځه تنه ټپيان کړي دي.
په سیمه کې یو شمېر سرچینو ازادي راډیو ته ویلي چې په دې چاودنه کې د طالبانو اووه پولیس وژل شوي او څوارلس تنه نور ټپیان شوي دي.
د دې قومانداني ویاند احسانالله کامګار په یوه بیان کې څرګنده کړه چې دا چاودنه نن ماسپښین د فیضاباد ښار د جوزګون په سیمه کې د پولیسو پر کاروان شوې ده.
د کامګار په وینا، چاودېدونکي مواد په یوه موټر سایکل کې ځای پرځای شوي وو او دا چاودنه هغه مهال وشوه چې د طالبانو پولیس د کوکنارو د کروندو د له منځه وړلو لپاره روان وو.
تراوسه چا یا کومې ډلې د دې چاودنې مسوولیت نه دی منلی.