د سمنګان-بلخ پر لویه لار پرون پنجشنبه په یوه ترافیکي پېښه کې ۵ کسان مړه او ۲۱ نور ژوبل شول.
په سمنګان ولایت کې د طالبانو ځايي چارواکو رسنیو ته وویل چې د دې پېښې په ټپیانو کې، چې د یوه ډینا موټر د چپه کېدو په نتیجه کې وشوه، د ۱۵ تنو حال نازک دی.
د پېښې دلیل د موټرچلوونکي بې احتیاطي بلل شوې ده.
په افغانستان کې په نسبي ډول ترافیکي پېښې ډېرې کېږي او د اکثرو علت د موټر چلوونکو د بې احتیاطۍ ترڅنګ د لارو خرابوالی ښودل کېږي.