ایراني چارواکي وایي د سوریې په پلازمېنه دمشق کې د دوی پر کونسلګرۍ د اسراییلي پوځیانو په پروني برید کې دوه ایراني جنرالان او پنځه افسران وژل شوي دي.
اسوشیتید پریس خبري اژانس ویلي چې برید کې د محمد رضا زاهدي په نوم د سپاه پاسداران انقلاب یو جنرال او د هغه مرستیال جنرال محمد هادي حاجي رحیمي وژل شوي دي.
په برید کې د ایران د کونسلګرۍ ودانۍ هم نړیدلې ده.
اسراییل چې پر ایراني اهدافو د بریدونو په اړه په اسانه تبصره نه کوي، د دغې پېښې په اړه له څه ویلو ډډه کړې ده.
د سوریې د بشري حقونو یوه ډله چې له برېتانیا څخه فعالیتونه کوي، ویلي چې د تېرې ورځې په دغه برید کې دوه سوریایي وګړي هم وژل شوي او د کونسلګرۍ دوه ساتونکي ټپیان شوي هم دي.
په سوریه کې د ایران سفیر حسین اکبري اسراییل ته په همدې کچه د لا جدي غچ خبرداری ورکړی دی.