د سوریې یوې څارونکې ډلې پرون یکشنبه ویلي، د اسلامي دولت ډلې د سوریې اته سرتېري له یوه کمین وروسته اعدام کړي دي.
دې ډلې په وینا، له دې سره په وروستیو ورځو کې د افراطي وسلوالو له خوا د سوریې د وژل شویو پوځیانو شمېر ۱۴ ته ورسېد.
د سوریې د بشري حقونو د څار ډله وايي په اتو اعدام شویو پوځيانو کې یو افسر هم شامل دی.
دا څارونکې ډله زیاتوي، د سوریې پوځیان روانه اوونۍ د سوریې له سخنه څخه د دیرالزور پر لوري روان وو چې پر یوه کمین وربرابر شول.
د دې ډلې په راپور کې نه دي ویل شوي چې دغه اته پوځیان دقیقاً کله اعدام شوي دي.
د داعش وسلوالو شپږ نور سرتېري روانه اوونۍ تر یرغمل کولو وروسته وژلي دي.
د روان میلادي کال له پیله د داعش په حملو کې د سوریې د وژل شویو سرتېرو او متحدو جنګیالیو شمېر ۲۰۰ ته ورسېد.