د روسیې ولسشمر وایي، روسیه دا نیت نه لري چې د ناټو په کوم غړي هېواد برید وکړي.
ولادیمیر پوتین زیاته کړه چې پر پولنډ به حمله ونه کړي، همداراز پر بالتیک هېوادونو یا پر چک جمهوریت؛ خو که چېرته لویدیځ ایف شپاړس جنګي الوتکې اوکراین ته ورکړي، روسیي ځواکونه به دا الوتکې نسکورې کړي.
ښاغلي پوتین دا خبرې د روسیې د هوایي ځواکونو پیلوټانو ته کولې او زیاته یې کړه چې د امریکا په مشرۍ ایتلاف له نولس سوه یو نویم کال راپه دې خوا چې پخوانی شوروي اتحاد ړنګ شو، د ختیځ خواته پراختیا موندلې ده، خو روسیه د دې هېوادونو پرضد د تېري نیت نه لري.