د کندهار لپاره د طالبانو والي ملا شیرین په یوه مکتوب کې ټولو چارواکو او ریاستونو ته امر کړی چې "په رسمي او غیر رسمي غونډو کې د ژوندیو مخلوقاتو له عکس اخیستلو ډډه وکړي".
د فرانسې خبري اژانس ته د کندهار مطبوعاتي دفتر دا مکتوب او د والي امر تایید کړی دی.
ملا محمد علي حنفي، چې د ملا شیرین په نوم مشهور دی د خپل دغه کار دلیل دا راوړی چې له ژوندیو موجوداتو عکس اخیستل هغوی ته د ګټې پر ځای تاوان رسوي.
ملا شیرین د طالبانو رهبر ملا هیبت الله اخند ته نږدې کس بلل کېږي.
هغه په خپل مکتوب کې بیا دا هم ویلي چې چارواکي کولای شي د خپلو فعالیتونوو په اړه لیکلې یا غږیز پیغامونه ورکړي.
دا لا څرګنده نه ده په کندهار کې چې د طالبانو مشرتابه هلته ده او د لویو پرېکړو مرجع ده څومره د والي دا امر پلی کېږي.
د طالبانو په لومړۍ دوره کې هم عکس او ویډیو محدوده وه.