د امریکا د بهرنیو چارو وزارت وایي، د افغانستان په اړه د دوحې جوړېدونکې غونډه کې د دوی دوه ډيپلوماتان ګډون کوي.
د دغه وزارت ویاند متیو مېلر پرون سه شنبه خبریالانو ته وویل چې د افغانستان لپاره د دوی ځانګړی استازی ټام ویست او د افغان ښځو، نجونو او بشري حقونو لپاره یې ځانګړې استازې رینا امیري د دوحې غونډه کې برخه اخلي.
ټاکل شوې د ملګرو ملتونو په کوربه توب د افغانستان په اړه د دوحې غونډه د راتلونکې یکشنبې او دوشنبې په ورځو جوړه شي.
متیو مېلر د ملګرو ملتونو د هغه پریکړه لیک ملاتړ کړی چې له مخې یې د افغانستان لپاره یو ځانګړی استازی ټاکل کیږي.
د نوموړي په خبره، دغه ځانګړی استازی به له افغانستان سره د نړیوال تعامل په همغږۍ کې ښه رول ولوبوي.
د طالبانو د حکومت لوړپوړو چارواکو بیا د ملګرو ملتونو د نوي استازي له ګمارنې سره مخالفت کړی او ویلې یې دي، د یوناما په موجودیت کې د بل ځانګړي استازي اړتیا نشته.