د طالبانو د حکومت ویاند ذبیح الله مجاهد د یوه نوي مرستیال ویاند د ټاکلو خبر ورکوي.
نوموړي پرون یکشنبې په خپله ایکسپاڼه یا پخواني ټویټرکې ویلي چې ملا حمدالله فطرت د دوی د مشر د لارښوونې په اساس د طالبانو د حکومت د مرستیال ویاند په توګه ټاکل شوی دی.
ښاغلي فطرت له دې مخکې د طالبانو د کډوالو او راستنیدونکو چارو وزارت د ویاند په توګه دنده ترسره کړې.
د طالبانو حکومت د نوي مرستیال ویاند د ټاکل کیدو خبروروسته له هغې ورکوي چې یو پخوانی مرستیال ویاند یې اسدالله بلال کریمي د تیر۲۰۲۳ کال د نومبرپه ۲۴ په چین کې د افغانستان د سفارت لپاره د طالبانو له لوري د نوي سفیر په توګه ټاکل شوی و.
نوموړي څه کم دوه اوونۍ مخکې خپل باورلیک د چین ولسمشر شي جین پینګ ته وړاندې کړ.