د افغان ښځو، نجونو او بشري حقونو لپاره د امریکا د متحدو ایالتونو ځانګړې استازې رینا امیري وايي، د بېلابېلو هېوادونو، ملګرو ملتونو او افغانانو له لسو استازو سره یې د افغان ښځو او نجونو پر ملاتړ خبرې وکړې.
مېرمن امیري تېره شپه په خپله ایکس شبکه یا پخواني ټویټر کې لیکلي، د طالبانو له خوا د ځپونکو اقداماتو له دوام سره دېته اړتیا ده چې په افغانستان کې په ډلهییز او قوي ډول د ښځو ملاتړ وشي.
مېرمن امیري په دې پیغام کې نه دي ویلي چې په دغو کتنو کې یې په مشخص ډول له چا چا سره کتلي دي.
طالبانو پر افغانستان د ولکې له بیاټینګولو وروسته د ښځو او نجونو پر تعلیم، تحصیل او کار محدودیتونه لګولي چې د بېلابېلو بنسټونو او هېوادونو انتقادونه یې پارولي دي.