د امریکا د بهرنیو چارو وزیر انټوني بلېنکن به منځني ختیځ ته د سفر په ترڅ کې نن د مصر په پلازمېنه قاهره کې د دې هېواد له چارواکو سره خبرې وکړي.
بلېنکن به په قاهره کې د مصر له ولسمشرعبدالفتاح السیسي سره وګوري.
نوموړي پرون دوشنبې په ریاض کې د سعودي عربستان له ولیعهد محمد بن سلمان سره وکتل.
بلېنکن به په دې سفر کې چې په غزه کې د جګړې له پیله په نژدې څلورو میاشتو کې منځني ختیځ ته د هغه پنځم سفر دی، وروسته اسراییل او قطر ته هم لاړ شي.
نوموړی به د هغو مذاکراتو د پرمختګ لپاره هڅه وکړي چې د مصري او قطري چارواکو په منځګړتوب له فلسطینۍ حماس ډلې سره د اسراییلي برمته وو د خوشې کولو په هدف روان دي.
متحده ایالات او اروپايي ټولنه حماس د یوې تروریستي ډلې په توګه پېژني.