په سوریه کې د ایران د سپاه پاسداران د ځواکونو پر مرکزونو د امریکا د بریدونو په ترڅ کې د فاطمیون لښکر د یوه جګپوړي غړي د وژل کیدو خبر ورکړل شوی.
له افغان وسله والو جوړ دغه ځواک د ایران د سپاه پاسدارن انقلاب په قدس څانګې پورې تړلی.
د ایران لپاره د ازادي راډیو د فردا څانګې پرون یکشنبې په خپله ایکس پاڼه یا پخواني ټویټرکې د ایران د فارس خبري آژانس له قوله لیکلي چې د فاطمیون لښکر دغه وژل شوی جګپوړی غړی، سید حمزه علوي نومیده چې په ۱۳۳۷ کال کې د افغانستان په پروان ولایت کې زیږیدلی و.
د راپور له مخې، نوموړی د شنبې په ورځ سهار مهال ووژل شو خو د څرنګوالي په اړه یې نورجزییات نه دي ورکړل شوي.
امریکا په دې وروستیو کې په سوریه کې د سپاه پاسدارن انقلاب ځواکونو او د ایران ملاتړو ملېشو مرکزونه د بریدونو لپاره په نښه کړي دي.