په پېکنګ کې د طالبانو ترکنټرول لاندې د افغانستان سفارت د پاسپورټونو د وېش د بهیر د پیلیدو خبر ورکوي.
دې سفارت نن په خپله ایکس پاڼه یا پخواني ټویټرکې د دې اعلان تر څنګ یوازې دومره ویلي چې د طالبانو د واکمنۍ په څه باندې دوه کلنه دوره کې یې په چین کې په قونسلي چارو کې د اسانتیاوو د رامنځته کولو لپاره هڅې کړې دي.
چین د نورو هېوادونو په څېر د طالبانو سرپرست حکومت په رسمیت نه دی پېژندلی، خو تېره اوونۍ یې د افغانستان د سفارت لپاره د طالبانو له خوا د ګومارل شوي سفیراسدالله بلال کریمي باورلیک ومانه.
د چین د بهرنیو چارو وزارت دا هم ویلي چې د طالبانو د حکومت په رسمیت پېژندل، د یوه ټولګډونه حکومت له جوړښت او له تروریزم سره پرېکنده مبارزې پورې تړلی دی.