د ملګرو ملتونو سرمنشي انټونیو ګوټېرېش په غزه کې د یوه سمدستي بشري اوربند غوښتنه وکړه.
هغه د سه شنبې په ورځ د ملګرو ملتونو امنیت شورا کې وینا وکړه.
ګوټېرېش وویل د غزې خلک له دومره پراخې تباهۍ سره مخ دي چې په معاصر تاریخ کې ساری نه لري.
د ملګرو ملتونو سرمنشي غزې تړانګې ته د زیاتو بشري مرستو د رسېدو لپاره غږ پورته کړ.
ملګرو ملتونو مخکې نیوکه کړې وه چې د دوی کارکوونکي د اسراییل له خوا د بشري مرستو ویش ته سم نه پرېښودل کېږي.
اسراییل هغه وخت دا نیوکې رد کړې وې.
په غزه باندې د اکتوبر له اوومې وروسته له هغه د اسراییل پراخې بمبارۍ او بریدونه پیل شول چې د امریکا او اروپا له خوا ترهګر ګڼل شوي سازمان حماس جنګیالیو پر اسراییل برید وکړ او لږ تر لږه ۱۲۰۰ کسان یې په یوه ورځ ووژل.
د اسراییل په ځوابي برید کې د حماس تر کنټرول لاندې غزې روغتیا وزارت د بیان په اساس تر دې دمه شاوخوا ۲۶زره کسان وژل شوي.
په غزه کې لکونه کسان بې کوره شوي او سختو مرستو ته اړتیا لري.