د ایران په جنوب ختیځ کې یو پوځي قوماندان وايي چې یوه سرتېري یې پرون یکشنبې پر نورو پوځیانو ډزې وکړې او پنځه تنه یې ووژل.
ایرنا دولتي خبري اژانس د پوځ د یوې قطعې د قوماندان امیرغلام علیان په قول راپور ورکړ چې دا پېښه په کرمان ولایت کې شوې ده.
غلام علیان د ایرنا خبریال ته ویلي چې حمله کوونکی سرتېری د وسله والو ځواکونو په یوه مورچه کې د پیرې په حال کې و چې ناببره د پوځي څارنې مرکز ته ننوت او پر پوځیانو یې ډزې وکړې.
د غلام علیان په وینا حمله کوونکی سرتېری په تېښته بریالی شوی دی.