د طالبانو حکومت وايي، د دوی د بهرنیو چارو سرپرست وزیر امیر خان متقي پرون کابل کې د ایران د قضایه قوې له مرستیال دکتور کاظم غریب ابادي سره په ایران کې د افغان بندیانو پر ستونزو هم خبرې وکړې.
د طالبانو د بهرنیو چازو وزارت په یوه اعلامیه کې ویلي، په دې کتنه کې «د زندانیانو د ستونزو پر حل، د زندانیانو پر استرداد د موافقتنامې پر پلي کولو، په اعدام محکوم شویو افغانانو ته د بدیلو میکانیزمونو پر پیدا کولو او د افغان مهاجرینو د نورو ستونزو پر حل» خبرې وشوې.
په اعلامیه کې ویل شوي، چې ایراني لوري په ایران کې د افغانانو د ځورونې د پېښو د مخنیوي لپاره د ځینو اقداماتو ژمنه وکړه.
د ایران په ګډون د نړۍ یوه هېواد هم د طالبانو سرپرست حکومت په رسمیت نه دی پېژندلی، خو ایران له ګوتو په شمېر هېوادونو دی، چې د طالبانو ډیپلوماتان یې منلي دي.
په ایران کې د افغانانو د ځورونې او افغانستان ته د جبري اخراج راپورونه ورکول شوي دي.