راپورونه وايي چې د کونړ د سرکاڼو ولسوالۍ کې د طالبانو د حکومت ځواکونو او پاکستاني پوله ساتو له یو بل سره ډزې تبادله کړي دي.
د سیمې ځینو اوسیدونکو ازادي راډیو ته ویلي چې د دواړو هېوادونو د سرحدي ځواکونو ترمنځ نښته د ګنجګل په ساحه کې د شنبې د ورځې په سهار پیل شوه چې د غرمې تر یولس بجو یې دوام وکړ.
د ځايي اوسیدونکو په وینا دواړو لور پر یو بل سپکې او درنې وسلې کارولې دي.
په کونړ کې د طالبانو یو امنیتي مسول ازادي راډیو ته ویلي چې نښته د پاکستاني ځواکونو له خوا پر ډیورنډ کرښه د یوې نوې پوستې جوړولو پر سر شوې .
تر اوسه هیڅ لوري په دې نښته کې د مرګ ژوبلې د اوښتو په اړه څه نه دي ویلي.
د پاکستاني او افغان پوله ساتو ترمنځ وخت ناوخت پر ډیورنډ کرښه د نویو تاسیساتو او پوستو جوړول لانجمنیږي او کله ناکله په نښتو اوړي.