د پاکستان په قلمرو کې د وسله والو ډلو پر پټنځایونو د ایران له خونړیو حملو وروسته د دې هېواد موقت صدراعظم انوارالحق کاکړ پرون د جنوري ۱۹مه د پوځ او استخباراتو له مشرانو سره په بېړنۍ امنیتي غونډه کې ګډون وکړ.
د پاکستان د صدراعظم له دفتر څخه د خپرې شوې خبرپاڼې له مخې، په پرونۍ غونډه کې د وضعیت بشپړه ارزونه وشوه او د پاکستان پر ملي حاکمیت د تېري په ځواب کې د مناسب غبرګون ستاینه وشوه.
ایران د سه شنبې په شپه د جنوري په ۱۶مه د پاکستان په خاوره کې پر هغو مرکزونو د توغندیو او بې پیلوټه الوتکو بریدونه وکړل چې تهران یې تروریستي اهداف بولي.
پاکستان هم په خپل وار د ځوابي حملو په ترڅ کې د پنجشنبې په ورځ د ایران په قلمرو کې دننه د وسله والو مرکزونه په نښه کړل.
پاکستان په تهران کې خپل سفیر رابللی او ویلي یې دي د ایران سفیر ته چې تهران ته تللی دی، اسلام آباد ته د ستنېدو اجازه نه ده ورکړل شوې.