د تهران یوې محکمې ایراني سندرغاړي مهدي یراحي ته د جبري حجاب په اړه د یوې سندرې د ویلو له کبله د بند او درو سزا واوروله.
د دې سندرې نوم" ستا پوړنی" دی.
د یراحي مدافع وکیلې زهرا مینوي نن پر خپله ایکس پاڼه ولیکل چې د تهران د انقلابي محکمې ۲۶مې څانګې دا سندرغاړی په دوه کاله او اته میاشتې بند او د ۷۴ درو په وهلو محکوم کړ.
پر هغه لګېدلی تور دا و چې غواړي د خلکو ذهنیت بدل او د رژیم پرضد تبلیغ وکړي.
مېرمن مینوي زیاته کړه چې یراحي اوس مهال د پنځلس میلیارد تومنه په نقدي ضمانت خوشې شوی دی.
دا سندرغاړی د ۲۰۲۳ کال په اګست میاشت کې ونیول شو او تر اکتوبر پورې په توقیف کې و او وروسته په ضمانت خوشې شو، خو له ننني حکم وروسته به نوموړی تقریبا یوکال په زندان کې تېروي.