افغان کرکټ بورډ په یوه خبرپاڼه کې ویلي چې افغانستان به له هندوستان سره تر سیالیو وروسته له سریلانکا او ایرلنډ سره لوبلړۍ ولوبوي.
د یادې ادارې د خبرپاڼې پر اساس، افغان لوبډله به د روان کال په فبرورۍ میاشت کې لومړی د سریلانکا په کوربتوب یوه ټېسټ، درې یو ورځنۍ او درې شل اوریزې سیالۍ ترسره کړي.
لومړی به دواړه هېوادونه یوازېنۍ ټېسټ سیالي د فبرورۍ په دوهمه نېټه پيل کړي او د همدې میاشتې په ۶مه نېټه به پای ته ورسېږي.
د یو ورځنیو سیالیو لوبلړۍ به د همدې میاشتې په ۹مه، ۱۱مه او ۱۴مه په کولمبو ښار کې ترسره شي.
دغه راز شل اوریزې سیالۍ به د فبرورۍ په ۱۷مه، ۱۹مه او ۲۱مه نېټه د ډامبولا په لوبغالي کې ولوبول شي.
له سریلانکا هېواد سره د لوبیز سفر تر پای ته رسېدو وروسته به افغان لوبډله د فبرورۍ میاشتې په ۲۸مه نېټه له ایرلنډ هېواد سره یوازېنۍ ټېسټ لوبه پیل کړي او د مارچ په ۳یمه به بشپړه شي.
له یاد هېواد سره سیالۍ چې د عربي متحده اماراتو په ابودبۍ ښار کې د افغانستان په کوربتوب ترسره کېږي، یو ورځنۍ سیالۍ به د مارچ په ۷مه، ۹مه، او ۱۲مه نېټو وي.
د همدې میاشتې په ۱۵مه، ۱۷مه او ۱۸مه نېټو به د دواړ هېوادونو ترمنځ د درې شل اوریزو سیالیو لوبلړۍ ترسره شي.
د ویلو ده چې تر یادو سیالیو وړاندې افغانستان د جنورۍ په ۱۱مه نېټه له هندوستان سره د درې شل اوریزو سیالیو لوبلړۍ پيلوي چې په ۱۷مه نېټه به بشپړې شي.