د پاکستان د خیبر پښتونخوا ایالت په باجوړ کې په يوه چاودنه کې ۵ پولیس وژل شوي او ۲۲ نور پولیس ټپیان شوي دي.
د ژغورنې ادارې، ريسکيو ۱۱۲۲ صوبايي وياند بلال فیضي نن د جنورۍ پر اتمه د ازادي راډیو مشال څانګې ته وويل چې برید د ماموندو په بېلوټ فرش سيمه کې هغه مهال وشو چې د پولیسو موټر د ګزمې په حال کې وو.
د پولیسو په خبره، دا په سړک کې د ښخ شوي بم چاودنه وه.
په دې برید کې هغو پولیسو ته مرګژوبله اوښتې چې د پوليو وايرس د کمپاینرانو اونورو روغتياپالانو د امنيت ساتلو دنده یې درلوده.
د واکسينو دا درې ورځنی کمپاين له نن څخه په خيبر پښتونخوا کې پيل شوی دی.
تحریک طالبان پاکستان د دې برید پړه په غاړه اخیستې، خو ادعا یې کړې چې د پولیو له کمپاین سره څه تړاو نه لري.
د باجوړ د پولیسو وياند اسرار احمد ازادي راډیو ته وویل چې تر لسو زیاتو ټپيانو حالت ښه نه وو او پېښور ته د درملنې لپاره لېږدول شوي دي.
د يو بل خبر له مخې پولیس وايي چې نن په پېښور 'قضایي کمپاونډ' کې د يو کس په ډزو کې یو تن وژل شوی او ۳ تنه ټپیان دي.
پولسو نن ازادي راډيو ته په لېږلو معلوماتو کې ویلي چې بریدګر نيول شوی او پلټنې ترې روانې دي.