په ایران کې د پرونیو چاودنو په تړاو د غبرګونو په دوام د طالبانو حکومت ویلي چې دا چاودنې غندي.
د طالبانو د حکومت د بهرنیو چارو وزارت په یوه بیان کې من سهار ویلي، په کرمان کې دا چاودنې چې د یو شمېر خلکو د وژل کېدو او ژوبلېدو سبب شوې غندي.
طالبانو په دې بیان کې زیاته کړې چې د ایران له دولت او د یادو پېښو د قربانیانو له کورنیو سره خواخوږي څرګندوي.
اخوا د افغانستان پخواني ولسمشر حامد کرزي هم دا چاودنې غندلي او د بشر ضد جنایت یې بللی.
د ملي مقاومت جبهې مشر احمد مسعود په یوه بیان کې دا چاودنې غندلي.
هغه زیاته کړې چې سیمه له ډېره وخته د ترهګرۍ قرباني ده.
پرون د ایران په کرمان کې د قدس ځواکونو د پخواني قوماندان قاسم سلېماني د تلین په مراسمو غبرګې چاودنې وشوې.
په پرونیو چاودنو کې لږ تر لږه ۱۰۳ کسان وژل شوي او ۲۱۱ نور کسان ټپیان شوي دي.