د جنوبي افریقا چارواکو پرون شنبه ویلي، د کوازولو ناتال ولایت په لاديسمیت ښارګوټي کې د سختو سېلابونو له کبله تر شلو زیات کسان مړه شوي دي.
د پولیسو یوه ویاند رابرت نیتشیوندا ویلي، له تېرې جمعې ۲۱ مړي موندل شوي، خو اټکل کېږي چې د مړو شمېر لا زیات شي.
د اسوشېټېډ پریس اژانس د خبر له مخې، چارواکي وايي په دغو سېلابونو کې شا و خوا ۱۴۰۰ کورونه ویجاړ شوي او نامعلوم شمېر کسان تري تم دي.
نیتشیوندا ویلي، چې د ژغورنې ډلې د نورو مړو د موندلو لپاره خپل عملیات روان ساتلي دي.