ملګرو ملتونو خبرداری ورکړ چې د اسراییل او حماس افراطي ډلې ترمنځ جګړه، غزه له قحطۍ سره مخامخوي.
دا خبرداری داسې وخت ورکول کېږي چې تمه کېږي د ملګرو ملتونو امنیت شورا نن جمعه د یوه پرېکړه لیک مسودې ته رایه ورکړي.
د فرانسې خبري اژانس د خبر له مخې، د دې پرېکړه لیک هدف د فلسطینیانو قلمرو ته د بشري مرستو زیاتول دي، خو د اوربند غوښتنه په کې نه ده شوې.
د نړۍ پر لوږې د څار سیستم چې ملګري ملتونه یې ملاتړ کوي، د اطلاعاتو له مخې چې پرون خپاره شوي، په غزه کې څه باندې نیم میلیون وګړي د غمیزې په څېر شرایطو سره مخامخ دي.
په غزه کې جګړه وروسته له هغې پیل شوه، چې حماس افراطي ډلې د اکټوبر میاشتې پر اوومه نېټه پر اسراییل په حملې سره لږ تر لږه ۱۲۰۰ کسان ووژل او ۲۴۰ نور کسان یرغمل کړل.
د حماس تر ولکې لاندې د غزې روغتیا وزارت نن ویلي چې په غزه کې د جګړې له کبله څه باندې ۲۰زره کسان وژل شوي دي، خو خپلواکو سرچینو دغه شمېرې تایید کړي نه دي.
د امریکا متحد ایالتونه او اروپايي ټولنه حماس افراطي ډله یو تروریستي سازمان ګڼي.