په نیمروز کې د طالبانو محلي چارواکي د ایران د زاهدان له یوه توقیفځای څخه افغانستان ته د ۲۰۰ نورو افغان بندیانو د لېږد خبر ورکوي.
د نیمروز لپاره د طالبانو د اطلاعاتو او فرهنګ ریاست پرون په یوه اعلامیه کې د نیمروز د بهرنیو ارتباطاتو د رییس مولوي یار محمد حقیار په وینا ویلي چې دغه ۲۰۰ افغان بندیان د قانوني اسنادو نه لرلو له کبله په ایران کې نیول شوي وو چې په نیمروز کې د طالبانو چارواکو ته وسپارل شول.
حقیار ویلي چې تېره اوونۍ هم ۱۹۳ بندیان تر خوشې کېدو وروسته نیمروز ته ستانه شوي دي.
ویل شوي، په تېرو څو میاشتو کې په ۹ پړاوونو کې ۴۸۰ تنه بندیان له ایرانه نیمروز ته ستانه کړای شوي دي.