د پاکستان د بلوڅانو احتجاجي لاریون چې د اسلام اباد خواته روان دی، پرون ناوخته د خیبر پښتونخوا ډېره اسماعیل خان سیمې ته ورسېده.
اعتراض کوونکي د پاکستان له حکومته له محکمې پرته وژل شویو او تري تم شویو بلوڅانو ته عدالت غواړي.
دوی ادعا کوي چې د پاکستان امنیتي ځواکونو زرګونه بلوڅان په زوره نیولي او بیا یې وژلي او تري تم کړي دي.
د مشال راډیو د راپور له مخې د پاکستان حکومت که څه هم د زرګونه بلوڅانو لادرکه کېدل نه مني، خو ویلي یې دي، له یو شمېر تورنو پولیسو یې پلټڼې پیل کړي دي.
اعتراض کوونکي هوډ لري چې په اسلام اباد کې د موقت صدر اعظم انوارالحق کاکړ د دفتر مخې ته پرلت ووهي.
د بلوڅانو له دغه لاریون سره پرون د پښتون ژغورنې غورځنګ یو شمېر فعالان هم یوځای شول.