په لسګونو خبریالانو نن د الجزیرې تلویزیون د خبریال سامر ابو دقه د خاورې ته سپارلو په مراسمو کې برخه واخیسته.
دا مراسم د غزې په خان یونس سیمه کې ترسره شول.
الجزیره تلویزیون چې مرکز یې په قطر کې دی، وایي چې ابو دقه د جمعې په ورځ هغه وخت د اسراییل بې پيلوته الوتکې وویشت چې په خان یونس کې یې له یوه ښوونځي څخه راپور ورکاوه.
د خبریالانو د خوندیتوب ټولنې ویلي دي چې د اکتوبر له اوومې چې په غزه کې جګړه پيل شوې ده تر اوسه په سیمه کې تر شپیته ډیر خبریالان او د رسنیو کارکوونکي وژل شوي دي.