د افغانستان د خبریالانو مرکز له طالبانو غوښتي دي چې د کندهار سیمه ییز خبریال عبدالرحیم محمدي له بنده خوشې کړي.
دې مرکز نن پر خپله ویبپاڼه په یوه بیان کې وویل، محمدي د لیندۍ په ۱۳مه په کندهار کې د استخباراتو ادارې ته احضار شوی و او له هغه راهیسې یې په اړه هېڅ معلومات نه شته.
په بیان کې د نوموړي د بې قید او شرطه خوشې کېدو غوښتنه شوې.
د افغانستان د خبریالانو مرکز د کندهار پر سیمه ایزو چارواکو هم غږ کړی چې که له دې خبریال څخه هرراز شکایتونه وي، نو باید د رسنیزو سرغړونو د کمیسیون له لارې وڅېړل شي.
د دې مرکز د معلوماتو له مخې، عبدالرحیم محمدي له ۱۳۹۸ کال راهیسې په کندهار کې د تمدن ټلویزیون لپاره کار کاوه.
پر افغانستان د طالبانو له واکمنېدو وروسته پر خبریالانو او رسنیو فشارونه زیات شوي.
تېره اونۍ د افغانستان د خبریالانو فدراسیون وویل چې د طالبانو استخباراتو د طلوع خورشیدراډیو یو پخوانی خبریال ضمیر ظهیر نیولی دی.
د طالبانو چارواکي عموما د خبریالانو او فعالانو د نیول کېدو د راپورونو په اړ څه نه وايي، خو پرله پسې ټینګار کوي چې د دوی حکومت د بیان ازادۍ ته د افغاني او اسلامي ارزښتونو په چوکاټ کې ژمن دي.