د پاکستان د بهرنیو چارو وزارت په افغانستان کې دننه د تحریک طالبان پاکستان یا (TTP) پر وړاندې د چټک اقدام غوښتنه وکړه.
پاکستاني رسنیو له دې ډلې سما شبکې راپور ورکړی، چې د پاکستان د بهرنیو چارو وزارت ویاندې ممتاز زهرا بلوچ دا خبره پرون پنج شنبه په یوه کنفرانس کې وکړه.
هغې ادعا کړې چې د پاکستاني طالبانو ډله، په افغانستان کې دننه له خپلو پټنځایونو خپلو فعالیتونو ته دوام ورکوي.
زهرا بلوچ د طالبانو له حکومته غوښتنه کړې چې د تحریک طالبان پر وړاندې اقدامات وکړي.
دوې اوونۍ مخکې د پاکستان سرپرست صدراعظم، انوارالحق کاکړ ویلي وو، له پاکستانه په سلګونو زره افغان کډوال ځکه اېستل کیږي چې افغانستان د هغو پاکستاني افراطي وسلوالو په مخنیوي کې پاتې راغلی چې د خاورې په کارولو سره یې په پاکستان کې عملیات مخ ته وړي.
خو د طالبانو د حکومت ویاند ذبیح الله مجاهد په یوه اعلامیه کې ویلي وو چې په پاکستان کې د امن ټینګول د طالبانو د حکومت مسوولیت نه دی.