د هند د کلکتې ښار له یو شمېر بېوزلو خلکو سره د افغان کرکټر رحمن الله ګربز له مرستو ګڼو هندیانو او کرکټرانو هرکلی کړی دی.
په خواله رسنیو په یوه ویډیو کې ښکاري چې د افغانستان د کرکټ ملي لوبغاړی رحمن الله ګربز د شپې له خوا هغو بیوزلو سره نغدي مرستې کوي چې د سړکونو څنګ ته پراته دي.
د دغه ویډیو په اړه ګڼو هندي رسنیو راپورونه ورکړي او هندیانو د افغان لوبغاړي دا کار ډېر ستایلی دی.
د کرکټ د نړۍ یو شمېر مشهورو لوبغاړو له هغې ډلې د نیوزیلند هندي الاصله لوبغاړی راچن رویندرا د ګربز د کار د ستایلو تر څنګ ویلي چې افغان لوبغاړي د کرکټ ډګر دننه او بهر د خلکو زړونه ګټلي دي.
افغان لوبغاړو تر دې مخکې په افغانستان کې له بیوزلو سره پراخې مرستې کړي چې لویه بېلګه یې د هرات زلزله ځپلو ته د نغدي مرستو راټولول دي خو دا ښایي لومړی وار و بهر کې له ځینو بیوزلو سره مرستې کوي.
د کرکټ په نړیوال جام کې د افغانستان د کرکټ د ملي لوبغاړو سفر په څلورو بریاوو او پنځو ماتو پای ته ورسېد او افغان لوبغاړي یکشنبه کابل ته ورسېدل.