په ایران کې ۱۶ کلنه ارمیتا ګراوَند چې له څه مودې په کوما حالت کې وه، نن شنبه ساه ورکړه.
ویل شوي دغه تنکۍ پېغله په بشپړ ډول د حجاب د نه رعایت په تور له پولیسو سره لاس و ګرېوان شوې وه او د اکتوبر پر لومړۍ نېټه په کوما حالت کې د تهران له یوې میټرو روغتون ته ولېږدول شوه.
د ایران ایرنا خبري اژانس نن شنبه راپور ورکړی چې ارمیتا د مغزي صدمې له کبله په کوما کې د څه وخت له تېرولو وروسته ساه ورکړه.
د ګراوند قضیې په لوېدیځ کې اندېښنې ولاړې کړې دي.
وروسته له هغې چې د ارمیتا ګراوند ویډیو چې په بېسده حالت کې له میټرو لېږدول کېږي، پر ټولنیزو شبکو خپره شوه، هم جرمني او هم د امریکا متحدو ایالتونو اندېښنې وښودې.
په ټولنیزو رسنیو کې د دغې نجلۍ قضیه د بلې ایرانۍ پیغلې مهسا امیني قضیې ته ورته بلل شوې چې څه باندې کال وړاندې په بشپړ ډول د حجاب نه رعایت په تور، د ګشت ارشاد پولیسو له خوا تر نیول کېدو وروسته په توقیف کې مړه شوه.