د اسراییل پوځ وايي اسراییلي ځواکونو د غزې پر پوله بیرته ولکه ټینګه کړې.
د اسراییلي پوځ ویاند ریچارد هیخت نن خبریالانو ته همداراز وویل چې د حماس ډلې د نژدې یو نیم زر تنه وسله والو مړي د اسراییل په خاوره کې دننه موندل شوي دي.
په عین حال کې د اسراییل پوځ پر غزې غچ اخیستونکو حملو ته زور ورکړی او خوراکي مواد، اوبه،د سونګ توکي او نور اکمالات یې پرې بند کړي دي.
بل خوا حماس خبرداری ورکړی، چې که اسراییل پر ملکیانو حملو ته دوام ورکړي یرغمل شوي اسراییلیان به ووژني.
حماس د شنبې په ورځ د اسراییل پر سرحدي سیمو ناڅاپي برید وکړ او لږترلږه ۱۳۰ تنه پوځي او ملکي اسراییلي یرغمل یې له ځان سره غزې ته راوستل.
د لویدیځو خبري اژانسونو د راپورونو له مخې، پر اسراییل د حماس په حملو کې د وژل شویو اسراییلي وګړو شمېر هم ۹۰۰ ته لوړ شوی دی.