د اسرايیل پوځ ویلي، چې د حماس ډلې د نژدې یو نیم زر وسله والو مړي په اسرایيل او د غزې تراړې شاوخوا سیمو کې موندل شوي دي.
د فرانس پریس خبري اژانس په وینا، د اسرایيل د پوځ ویاند ریچارد هیخت نن له خبریالانو سره دغه شمېرې شریکې کړي دي.
نوموړي زیاته کړې چې اسرايیلي ځواکونو د غزې پر پوله خپل کنټرول بیرته تر یوه حده ټینګ کړی دی.
اسرایيلي ځواکونو پر غزې غچ اخستونکي بریدونه شدید کړي او پر دغه ښار یې خوراکي مواد، اوبه، سون توکي او نور اکمالات بند کړي دي.
بل لورته حماس خبرداری ورکړی، چې که اسرايیل پر ملکیانو بریدونو ته دوام ورکړي، یرغمل شوي اسراییليان به ووژني.
حماس د شنبې په ورځ د اسرایيل په سرحدي سیمو هجوم وروړ او لږ تر لږه ۱۳۰ پوځي او ملکي اسرایلیان یې له ځان سره غزې ته یرغمل کړل.
د لویدیځو اژانسونو په وینا، پر اسرایيل د حماس په بریدونو کې د وژل شویو اسراییلیانو شمېر هم ۹۰۰ ته پورته شوی دی.