د هند کرکټ لوبډلې سریلانکا ته د پنځوس اوره کرکټ اسیا جام سیالیو په پایلوبه کې ماتې ورکړه او اتلولي یې وګټله.
په نننۍ پایلوبه کې سریلانکا پچه ګټلې وه او ټوله لوبډله په شپاړسم اور کې په پنځوسو منډو وسوځېده.
د هند محمدسراج په اوو اورونو کې د ۲۱ منډو په ورکولو شپږ ویکیټې واخیستې.
ده په یوه اور کې څلور لوبغاړي هم وسوځول.
د هند بومرا یوه او هارډیک پانډیا درې ویکیټې واخیستې.
ورپسې د هند ملي لوبډلې د سریلانکا ورکړل شوی هدف په اووم اور کې پوره کړ.
شبمن ګېل او ایشان کیشان په ۲۷ او ۲۳ منډو دغه هدف پوره کړ.
محمدسراج د نننۍ پایلوبې د غوره لوبغاړي جایزه واخیسته.