د خیبر پښتونخوا چارواکي وايي نن د پېښور پر ورسک روډ بمي چاودنه کې د سرحدي ځواکونو 'ایف سي' يو سرتېری وژل شوی دی.
د ژغورنې ادارې ۱۱۲۲ وياند بلال فیضي نن د سپټمبر په ۱۱مه مشال راډيو ته وويل چې په یوولسو بجې شوې چاودنه کې ۷ نور سرتېري او ۳ عام وګړي ټپیان شوي هم دي.
د چارواکو په خبره، ژوبل کسان د پېښور 'سي ایم ایچ' روغتون ته د درملنې لپاره وړل شوي دي.
تحریک طالبان پاکستان یا 'ټي ټي پي' د برید مسوولیت منلی دی.
په خیبر پښتونخوا کې وسلهوال بریدونه په داسې حال کې ډېر شوي چې د کورنيو چارو سرپرست وزير سرفراز بګټي پرون د سپټمبر په ۱۰مه وويل چې ترهګري د اندېښې تر کچې نه ده زیاته شوې.
هغه په اسلام اباد کې په يوه خبري غونډه کې زیاته کړه چې امنيتي ځواکونه د وسلهوالو د بيا راپورته کېدو مخنيوي لپاره بیداره دي.