د پاکستان صدراعظم شهباز شریف په افغانستان کې د طالبانو له حکومته وغوښتل چې د افغانستان له خاورې پاکستان ته د ترهګرو د ننوتو مخه ونیسي.
شهباز شریف پرون دا خبره په پېښور کې د باجوړ د پېښې له ټپيانو څخه په روغتون کې د لیدنې پر مهال وکړه.
په باجوړ کې د یکشنبې په ورځ د جمعیت علمای اسلام، فضل الرحمان ډلې پر غونډه چاودنه وشوه.
د دې چاودنې له امله ۵۵ تنو خپل ژوند له لاسه ورکړ او شاوخوا ۲۰۰ تنه نور ټپیان شول.
د پاکستان صدراعظم وویل چې د افغان طالبانو حکومت باید جدي ګامونه واخلي او دا خبره نوره ونه کړي چې د افغانستان له خاورې ترهګر استفاده نه کوي.
د باجوړ د چاودنې مسوولیت داعش خراسان څانګې اخیستی دی.