د طالبانو د حکومت د سرحدونو او قبایلو وزارت وايي، له پنځو ګاونډیو هېوادونو سره یې د افغانستان د پولو د نښه کولو د پلان تطبیق پیل کړی دی.
د طالبانو د حکومت د سرحدونو او قبایلو سرپرست وزیر نورالله نوري پرون دوشنبه د خپل وزارت د کارونو په اړه د راپور ورکولو په ترڅ کې وویل، له ایران، ترکمنستان، ازبکستان، تاجکستان او چین سره د افغانستان د پولو د نښه کولو چارې په ځینو برخو کې بشپړې شوي دي.
ده د پاکستان یادونه ونه کړه.
افغانستان د پاکستان په شمول له شپږو هېوادونو سره پوله لري.
تر دې مخکې ځینو افغانانو ادعا کړې چې د افغانستان لور ته د امو سیند د بهیر د بدلېدو له کبله د افغانستان د خاورې ځینې برخې شمالي ګاونډیانو ته پاتې شوي دي.