د سعودي عربستان او اسراییل ترمنځ د اړیکو د عادي کولو په اړه په جده کې له سعودي چارواکو سره د امریکا د ملي امنیت د سلاکار له خبرو وروسته د امریکا ولسمشر جو بایډن پرون (جمعه وویل) چې ښايي موافقه وشي.
ښاغلي بایډن چې د مین ایالت په فري پورټ ښار کې د خپل انتخاباتي کمپاین پلویانو ته وینا کوله، وویل: " احتمال شته چې اړیکې بېرته عادي شي."
ده د دوو خواوو ترمنځ د احتمالي جوړجاړي جزییاتو ته اشاره ونه کړه.
امریکايي چارواکي له څو میاشتو راهیسي د اسراییل او سعودي عربستان ترمنځ د تاریخي جوړجاړي په لټه کې دي خو سعودي عربستان تراوسه پورې لېوالتیا نه ښيي.