د اروپایي ټولنې د امنیتي چارو او بهرني سیاست مشر جوزیف بورېل په اروپا کې قرانکریم ته د سپکاوي وروستي اعمال وغندل او ویې ویل چې قران یا بل هر سپېڅلي کتاب ته سپکاوی، بې حرمتي، بې احترامي او ښکاره لمسونه ګڼل کېږي.
بورېل نن چهارشنبې په یوه خپاره کړي بیان کې ویلي چې تنوع ته درناوی د اروپایي ټولنې یو اساسي ارزښت دی او زیاتوي چې په دې کې د نورو مذهبي ټولنو درناوی هم شامل دی.
بورېل وویل، اروپایي ټولنه په کور دننه او بهر د مذهبي یا د عقیدې او د بیان د ازادۍ ملاتړ کوي، خو د ده په خبره هر هغه څه چې قانوني دي، اخلاقي نه دي.
نوموړی دغه څرګندونې وروسته له هغې کوي چې څو ورځې وړاندې د ډنمارک په پلازمېنه کوپنهاګن کې یوه کس د عراق د سفارت مخې ته د قرانکریم نسخې وسوځولې.
تر دې مخکې څو میاشتې وړاندې په سویډن کې هم یو کس ورته یو عمل سرته رسولی و چې اسلامي هېوادونو یې پر وړاندې سخت غبرګون ښکاره کړ.