د ارمنستان صدراعظم نیکول پاشنیان وايي، د روانې میاشتې په پنځلسمه نېټه به په بروکسل کې د اذربایجان له ولسمشر الهام علییف سره وګوري.
پاشنیان نن په یوې دولتي ناسته کې د دې لیدنې خبر ور کړی او ویلي دي، د اروپايي ټولنې د شورا مشر چارلس میشل به هم په دې لیدنې کې د دوی ملتیا کوي.
پاشینان په دې ناسته کې هیله څرګنده کړه، چې له اذربایجان سره د سولې تړون په خبرو اترو کې پرمختګ وشي.
د ارمنستان او اذربایجان ترمنځ د نګورنو قرباغ په لانجمنه سیمه کې په ۲۰۲۰ کال کې د شپږو اونیو د جګړې پر مهال دواړو خواو ته نږدې ۷ زره سرتېري وژل شوي وو.