د طالبانو حکومت وايي، په کونړ ولایت کې د ماڼوګي ولسوالۍ د برښنا د بند د رغونې چارې به بشپړې کړي.
د طالبانو د حکومت ریاست الوزرا پرون پر خپل ټویتر خبر ورکړ چې د اقتصادي کمېسیون نوبتي غونډې پرېکړه وکړه چې د مالیې وزارت دې د ماڼوګي بند د رغونې د پاتې چارو د بشپړولو په هدف د قرارداي شرکت پیسې ورکړي او یاد شرکت باید د پوروړو پیسې پرې کړي.
دا اعلان داسې مهال کېږي چې د ۲۰۲۱ کال په اګست کې د طالبانو له بیا واکمنېدو وروسته له افغانستان سره د نړیوالو مرستو د کمېدو له کبله د سلګونه عام المنفعه پروژو د رغونې چارې په ټپه ولاړې دي او ډېرې پروژې نیمګړې پاتې دي.