د روسیې یو توغندی بېګاه شپه د اوکراین د دنیپرو پیتروفسک سیمې په کریوي ریه ښارګوټي کې د استوګنې پر یوه ودانۍ لګېدلی چې شپږ کسان یې وژلي دي.
د کریوي ریه ښاروال اولیکساندر ویلکول نن پر خپله ټلېګرام پاڼه ولیکل چې، دې توغندي ۲۵ نور کسان ټپيان کړي هم دي چې، د ۱۳ کسانو وضعیت نازک دی.
د ویلکول په وینا، ښايي پنځه نور کسان لا هم د ویجاړې ودانۍ تر کنډوالو لاندې پاتې وي.
د اوکراین ولسمشر ولودمیر زیلینسکي یو ځل بیا روسیه تروریستي دولت وباله او پر خپله ټلېګرام پاڼه یې ولیکل چې تروریستان به ونه بخښل شي.
د روسیې لهخوا پر اوکراین د توغندیو وروستیو حملو داسې مهال زور اخیستی چې د روسیې د یرغل پر ضد د اوکراین ځوابي عملیاتو نتیجه ورکړې او په جنوب او ختیځو سیمو کې شپږ ښارګوټي ازاد شوي دي.