د پاکستان د مخکیني صدراعظم عمران خان له نیول کېدو وروسته د هغه د پلویانو او د بلوا ضد پولیسو ترمنځ د اخ و ډب راپورونه ورکړل شوي دي.
عمران خان نن په اسلاماباد هغه مهال ونیول شو چې د فساد د څو تورونو په قضیه کې د سپیناوي لپاره یوې محکمې ته ورغلی و.
د عمران خان د تحریک انصاف ګوند یوه جګپوړي مشر فواد چودري نن وویل، مخکینی صدراعظم د اسلاماباد د عالي محکمې له ودانۍ د احتساب د ملي ادارې د کارکوونکو لهخوا د ځانګړیو پولیسو یوه موټر ته واچول شو.
چودري د عمران خان نیول کېدل یرغمل کېدو ته ورته بللي دي.
هغه ویلي چې د عمران خان د نیول کېدو پر مهال یو شمېر وکیلان او عام خلک وهل ټکول شوي دي.
د اسلاماباد پولیسو د یوې اعلامیې په خپرولو سره ویلي چې عمران خان پر هغه د فساد د لګېدلو تورونو د یوه مهم تور په تړاو نیول شوی دی.