د پښتون ژغورنې غورځنګ مشر منظور پښتین د دوشنبې په ورځ پر خپله ټوېټرپاڼه لیکلي چې اوس هم پاکستاني پولیس د سند ایالت په کراچۍ ښار کې له افغانانو سره غیرانساني چلند کوي.
نوموړي په کراچۍ کې د پښتون ژغورنې غورځنګ له غړو غوښتي چې د دې غیرانساني چلند په وړاندې خپل غږ پورته کړي.
منظور پښتین داسې مهال د پاکستاني پولیسو لخوا د افغانانو په زنداني کولو نیوکه کوي چې په پاکستان کې د افغان کډوالو د مدافع وکیلې منیزې کاکړ پرون ازادي راډيو ته وویل، اوس هم د ۱۰۰ په شاوخوا کې افغانان د پاکستان په سند ایالت کې زنداني دي.
د اغلې کاکړ په وینا، د سند پولیسو مخکې هغه افغانان نیول او زنداني کول چې اسناد یې نه درلودل، خو نوموړې زیاتوي چې اوس اسنادلرونکي افغانان هم نیسي.
په تېر یوه کال کې د هغو افغانانو له ډلې چې له قانوني اسنادو پرته پاکستان ته د درمنلې په خاطر تللي او زنداني شوي وو، څلور تنه یې په زندان کې مړه هم شول.
د طالبانو د حکومت د بهرنیو چارو وزارت مرستیال ویاند حافظ ضیا احمد نن په یوه بیان کې ویلي چې د بهرنیو چارو سرپرست وزیر امیرخان متقي د پاکستان له زندانونو د افغانانو د خوشې کېدو په اړه له خپل پاکستاني سیال بلاول بوټو زرداري سره خبرې کړې دي.