د خوړو نړیوال پروګرام ډبلیوافپي یو ځل بیا خبرداری ورکړی چې، که هغه ۸۰۰ میلیون ډالر چې د ملګروملتونو دې ادارې له نړیوالو غوښتي ترلاسه نهکړي نو د افغانستان بېوزلي خلک به له سختو ستونزو سره مخامخ شي.
د خوړو نړيوال پروګرام وياند وحیدالله اماني بېګا ناوخته ازادي راډیو ته په دې اړه وویل: "د راتلونکو شپږو میاشتو لپاره موږ ۸۰۰ میلیون ډالرو ته اړتیا لرو. که دا ۸۰۰ میلیون ډالر زموږ په واک کې رانهکړل شي نو له سختو ستونزو سره به لاس او ګرېوان یو او ښايي د افغانستان د خلکو بشري وضعیت تر دې هم خراب شي."
له دې مخکې د ملګروملتونو د بشري مرستو د سمون ادارې یا اوچا له افغانانو سره د مرستې لپاره د کافي بودیجې د نشتوالي خبره کړې وه.
اوچا ویلي و، له هغو پیسو چې م. م په روان میلادي کال کې د بشری مرستو لپاره غوښتې وې یوازې څه کم پنځه سلنه یې ترلاسه کړې دي.
دې ادارې په دې وروستیو کې خبرداری ورکړی و، چې که دا مالي مرستې ترلاسه نهکړي دا خطر شته چې میلیونونه بېوزلو افغانانو ته بشري مرستې ونه رسېږي.