د پاکستان د تحریک انصاف مشر او پخواني صدارعظم عمران خان یو ځل بیا ادعا وکړه، چې محکمې ته د نه حاضرېدو علت یې ژوند ته ګواښ دی.
په پاکستان کې یوې محکمې د عمران خان د مدافع وکیلانو دا غوښتنه رد کړه چې د ده د نیولو امر دې بېرته واخیستل شي.
دې وکیلانو ویلي وو چې عمران خان به د خپلې واکمنۍ پر مهال پر وخت د سوغاتونو د پلورلو د اختلاس د تور د سپیناوي لپاره محکمې ته حاضر شي، خو د ده د نیولو امر دې وځنډول شي.
عمران خان په لاهور کې په خپل کور کې ایسار دی او روانه اوونۍ د ده د نیولو پر مهال د پولیسو او د عمران خان د ملاتړو ترمنځ اخ وډب وشو خو پولیس د عمران خان په نیولو بریالي نه شول.
عمران خان چې په اپرېل میاشت کې له واکه لیرې کړای شو د سوغاتونو د پلورلو تر څنګ په ترهګرۍ او یوشمېر نورو غیرقانوني کارونو تورن شوی دی.